ਪੁਲਿਸ ਨੂੰ ਕਾਂ ਦਾ ਖੌਫ! ਖਾਕੀ ਪੱਗ ਵਾਲੇ ਮੁਲਾਜ਼ਮਾਂ ਨੂੰ ਹੀ ਬਣਾਉਂਦਾ ਨਿਸ਼ਾਨਾ
ਬਠਿੰਡਾ ਬੱਸ ਸਟੈਂਡ ‘ਤੇ ਇੱਕ ਅਨੋਖਾ ਮਾਮਲਾ ਸਾਹਮਣੇ ਆਇਆ ਹੈ, ਜਿੱਥੇ ਡਿਊਟੀ ਕਰ ਰਹੇ ਪੁਲਿਸ ਮੁਲਾਜ਼ਮ ਇਨਸਾਨਾਂ ਤੋਂ ਨਹੀਂ, ਸਗੋਂ ਇੱਕ ਕਾਂ ਤੋਂ ਪਰੇਸ਼ਾਨ ਹਨ। ਪੁਲਿਸ ਮੁਲਾਜ਼ਮਾਂ ਦਾ ਕਹਿਣਾ ਹੈ ਕਿ ਪਿਛਲੇ ਕਈ ਦਿਨਾਂ ਤੋਂ ਇੱਕ ਕਾਂ ਲਗਾਤਾਰ ਡਿਊਟੀ ਦੌਰਾਨ ਉਨ੍ਹਾਂ ਦੇ ਆਲੇ-ਦੁਆਲੇ ਮੰਡਰਾਉਂਦਾ ਹੈ ਅਤੇ ਮੌਕਾ ਮਿਲਦੇ ਹੀ ਖਾਕੀ ਪੱਗ ਪਹਿਨੇ ਮੁਲਾਜ਼ਮਾਂ ਦੇ ਸਿਰ ‘ਤੇ ਚੁੰਝ ਮਾਰ ਕੇ ਉੱਡ ਜਾਂਦਾ ਹੈ।
ਮੁਲਾਜ਼ਮਾਂ ਅਨੁਸਾਰ ਹੈਰਾਨੀ ਵਾਲੀ ਗੱਲ ਇਹ ਹੈ ਕਿ ਕਾਂ ਕਿਸੇ ਆਮ ਰਾਹਗੀਰ ਜਾਂ ਹੋਰ ਵਿਅਕਤੀ ਨੂੰ ਤੰਗ ਨਹੀਂ ਕਰਦਾ, ਸਗੋਂ ਸਿਰਫ਼ ਖਾਕੀ ਪੱਗ ਵਾਲੇ ਪੁਲਿਸ ਕਰਮਚਾਰੀਆਂ ਨੂੰ ਹੀ ਨਿਸ਼ਾਨਾ ਬਣਾਉਂਦਾ ਹੈ। ਇਸ ਕਾਰਨ ਡਿਊਟੀ ਦੌਰਾਨ ਉਨ੍ਹਾਂ ਨੂੰ ਟਰੈਫਿਕ ਅਤੇ ਹੋਰ ਸਥਿਤੀਆਂ ਦੇ ਨਾਲ-ਨਾਲ ਕਾਂ ‘ਤੇ ਵੀ ਨਜ਼ਰ ਰੱਖਣੀ ਪੈਂਦੀ ਹੈ।
ਪੁਲਿਸ ਮੁਲਾਜ਼ਮਾਂ ਨੇ ਦੱਸਿਆ ਕਿ ਕਾਂ ਪਹਿਲਾਂ ਨੇੜਲੇ ਦਰੱਖਤ ‘ਤੇ ਬੈਠ ਕੇ ਨਿਗਰਾਨੀ ਕਰਦਾ ਹੈ ਅਤੇ ਜਿਵੇਂ ਹੀ ਮੌਕਾ ਮਿਲਦਾ ਹੈ, ਸਿਰ ‘ਤੇ ਚੁੰਝ ਮਾਰ ਕੇ ਫਿਰ ਉੱਡ ਜਾਂਦਾ ਹੈ।
ਮਾਹਿਰਾਂ ਮੁਤਾਬਕ, ਅਜਿਹਾ ਵਿਹਾਰ ਕਈ ਵਾਰ ਉਸ ਸਮੇਂ ਵੀ ਦੇਖਿਆ ਜਾਂਦਾ ਹੈ ਜਦੋਂ ਕਾਂ ਆਪਣੇ ਘੋਂਸਲੇ ਜਾਂ ਬੱਚਿਆਂ ਦੀ ਰੱਖਿਆ ਕਰ ਰਿਹਾ ਹੋਵੇ ਜਾਂ ਉਸ ਨੂੰ ਕਿਸੇ ਖ਼ਾਸ ਵਿਅਕਤੀ ਜਾਂ ਚੀਜ਼ ਨਾਲ ਖ਼ਤਰਾ ਮਹਿਸੂਸ ਹੋਵੇ। ਹਾਲਾਂਕਿ ਇਸ ਮਾਮਲੇ ਵਿੱਚ ਅਸਲ ਕਾਰਨ ਕੀ ਹੈ, ਇਹ ਸਪੱਸ਼ਟ ਨਹੀਂ ਹੈ।
ਫਿਲਹਾਲ ਇਹ ਘਟਨਾ ਬਠਿੰਡਾ ਬੱਸ ਸਟੈਂਡ ‘ਤੇ ਚਰਚਾ ਦਾ ਵਿਸ਼ਾ ਬਣੀ ਹੋਈ ਹੈ ਅਤੇ ਪੁਲਿਸ ਮੁਲਾਜ਼ਮ ਵੀ ਹੱਸਦੇ ਹੋਏ ਕਹਿੰਦੇ ਹਨ ਕਿ ਹੁਣ ਡਿਊਟੀ ਦੇ ਨਾਲ-ਨਾਲ ਕਾਂ ਤੋਂ ਵੀ ਸਾਵਧਾਨ ਰਹਿਣਾ ਪੈਂਦਾ ਹੈ।
